Dating : 隨想（2019/KW27）

給同輩朋友們的幾句說話

寫政治，真係好撚悶。我一邊寫，一邊嘅感覺好似將我大學嘅thesis、甚至係PhD嘅thesis變成BB話再講一次咁；好奄悶。

又：由於局勢關係，呢篇《隨想》將會與原定今日推出嘅《中環遊戲》對調；不便之處，敬請原諒。

奄悶嘅原因，並唔係因為我要講理論；奄悶嘅原因，係因為我要講、而你哋未必明、明又唔理解嘅嘢，並唔係高深嘅政治理論，而係一啲幾歲細路都識、但偏偏你哋視若無睹嘅三毫子道理。

首先，唔好再緬懷嗰啲甚麼「我哋要俾全世界睇，香港人好高質素」、「我哋和平表達訴求」呢啲咁戇撚鳩嘅光環喇，好唔好？家陣唔係幼稚園等先生喺手冊扱白兔仔呀。為咗光環去否定一啲唔應該否定嘅嘢，咁樣做係本末倒置。

試想像，喺過去嘅幾個星期，如果唔係喺前線呢班人變化多端嘅戰術去干擾政府嘅運作、令到政府同黑警進退失據，試問你哋邊有機會展示你哋嘅「和平表達訴求」？

更何況，我喺德國聽見嘅聲音都話俾我聽，掌聲，係俾靈活多變嘅冇大台群眾活動，而唔係俾你哋行禮如儀嘅上街遊行然後自己執垃圾。咁當然，我絕對相信，各國領袖們係真心讚嘆你哋嘅和理非行動嘅 — 將心比心，如果歐美嘅國民面對住中共同香港特區政府級數嘅迫害，都仲係咁和理非、咁驚破壞和平，其實喺呢班領袖心目中，呢啲國民真係有今生冇來世吖。

換句說話講，人哋讚嘆嘅，其實係你哋嘅奴性。唔好信我鳩噏，有時間去問吓你身邊嘅外國朋友，睇吓佢哋點講。

更加唔好一有嘢唔啱睇就話人哋係鬼。郁啲就鬼鬼聲，仲難聽過老婆去夜街就話佢勾佬。

作為一個四十幾歲、乜都叫有啲嘅廢中，我絕對明白，你哋要輸的話，實在太多嘢輸。佢哋唔會明白我哋呢啲廢中究竟有幾多嘢放唔開；正等如我哋唔會明白，點解班年青人要衝一樣。

但係，你哋係咪只會支持一啲你哋明白嘅嘢？相對論你明白嘛？萬有引力你明白嘛？唔明點解你仲要支持？搞清楚，我哋唔需要明白每一樣我哋支持嘅嘢嘅。

中文有個詞語，叫「諒解」；體諒同理解。體諒一吓佢哋喺前線幾個星期、做盡要做嘅嘢、換嚟只有政府幾句鳩噏嘅絕望心情，理解一吓佢哋寧願犧牲自己嘅前途、都決定要放手一搏嘅心態。冇人可以強迫你哋去支持任何嘢，但起碼，唔好有乜郁就衝出嚟割蓆、然後譴責。

做咗三四十年人，我明白香港係個功利社會，我亦明白我哋老豆老母由細到大都教我哋「執輸行頭、慘過敗家」；但大家亦都要開始學習，唔好再做勝利球迷。要贏，我哋一齊贏；要輸，我哋一齊輸。

人，已經衝咗入去；再喺網上辯論佢哋應唔應該咁做，只係浪費時間。喺網上，我聽到好多嘅意見。有人話，和理非最好而家去立法會門口和平集會，保護衝咗入去嘅人。有人話，泛民嘅議員應該全體入去保護年青人。

我作為一個身處十萬九千里之外嘅人，實在唔應該喺實際行動上面鳩噏太多。我只希望作為我嘅朋友，大家都用你哋認為係最適合嘅方法，去保護我哋嘅下一代。因為，佢哋付出嘅，實在太多；我哋呢班廢中，實在逃避得太耐。

至於我身邊一群幾個星期以嚟、仍然保持漠不關心嘅朋友，你哋呢段時間嘅打卡相、每個月幫仔女開生日party嘅相、同你哋冚家去玩嘅相，我都已經睇過晒喇。真係好羨慕你哋仲可以咁開心！我完全唔介意你哋嘅冷漠，我甚至唔介意你哋變身做埋藍絲 — 講真，都咁多年朋友咯，你哋係咩人，唔通我會唔知咩！

我唔介意嘅另外一個原因，係我見到你哋絕大部分都已經有下一代，而你哋又未至於叻到可以將佢哋送去外國留學、或者去國際學校就讀。 我好清楚，你哋今日嘅冷漠、不關心、選擇高牆而非雞蛋，將會有一日完全報應喺你哋苦心栽培嘅仔女身上。

每當諗到呢度，作為朋友，我仲點捨得怪責你哋。萬般帶不走、唯有業隨身，我希望你哋了解你哋自己嘅選擇。粗啲講句：條路自己揀、仆街唔好喊。