Dating : The Guns of August

非會員閱讀link

啲武漢肺炎啱啱先叫靜返啲，話口未完，香港又嚟料……

喺香港，中共同林鄭班hihi的確冇諗住俾大家唞吓嘅意欲。於是，武肺疫情過得七七八八，就慌死大家會hae落嚟咁，又國安法又國歌法又盛咁，乜都晒撚晒冷推晒出嚟盡地一煲。

香港今日（527）嘅「戰況」係點，相信大家喺直播或者FB都會有大量資訊，所以我亦無謂加把口。我想講吓，點解美國今次對國安法個反應咁大。

其實唔係咁難解釋：一切都係選舉年作怪。

喺美國，但凡總統選舉年，所有嘅議題，都會粗分為三個類別（冇人會將佢再細分）：

• 經濟、醫療、教育、社會福利、民生呢啲議題，屬於「Mommy Problem」；
• 軍事、國防、外交、國土安全、情報呢啲議題，屬於「Daddy Problem」；
• 所有唔屬於呢兩個類別、而又可以影響選情嘅議題，如總統性醜聞、通俄門、候選人健康問題、Benghazi Attack等等，通通都屬於「Trivia」。

喺呢個輿論主導嘅國度，如果最後選民以Mommy Problem決定投票意向的話，一般嚟講民主黨會嬴；如果最後選民以Daddy Problem決定投票意向的話，一般嚟講共和黨會嬴。如果選戰最後折墮到要以Trivia決定生死的話，咁就各安天命，the least rotten fruit managed to crawl to the finish line wins。

喬治布殊喺2004年，就係咁樣以阿富汗同伊拉克嘅戰爭連任成功。

作為候選人嘅競選團隊，佢哋嘅唯一責任，就係不惜一切代價、將舉國嘅輿論，扭向對己方有利嘅議題上。

留意「不惜一切」呢四個字，literally。遇父殺父、遇佛殺佛，無所不用其極。因為喺政治上，no point for second place，連安慰獎都冇。唔單只咁，好似Trump呢啲咁「破格」嘅總統，一旦喺連任選舉失敗，繼任嘅「對家」總統，應該非常容易喺archives當中、搵到要佢一身蟻嘅證據。

所以，對Donald Trump嚟講，連唔到任係件不能想像嘅事，連諗吓都會發惡夢。就算唔係有痛腳呢啲陰毛論，作為一個叱吒風雲嘅CEO，要佢輸，其實已經唔係佢老人家可以面對嘅現實。

問題係，現今美國嘅現況，對佢嚟講，實在唔係最favourable嘅環境。乜都唔好講，「武肺疫情」，其實係個Mommy Problem；再加上Trump係整個疫情期間嘅「傑出」表現，如果疫情拖拉到年底的話，基本上拜登唔需要做太多嘢，只要唔好開口夾著脷或者爆壇#metoo，就可以坐定定等當選。據我嘅理解，Trump佢老人家唔係冇諗過，整個武漢肺炎嘅事件，其實係中國為咗換返個「正正常常」親華嘅民主黨總統而設嘅「局」。

「吓？！乜嗰隻Pooh唔係同佢好friend嘅咩？！」某啲直咇港人表示。

等我又回吓帶先。英國首相巴麥尊勳爵（Henry John Temple, 3rd Viscount Palmerston）嘅名句：

「We have no eternal allies, and we have no perpetual enemies. Our interests are eternal and perpetual, and those interests it is our duty to follow.」

大家參詳吓上面呢句說話，要明箇中玄機其實唔係咁難嘅啫。嗰隻Winnie the Pooh你阿嬤，最多係狼狽為奸嘅「朋友」，談何道義？

再唔係，大家可以睇吓最近一個星期、美國唔同機構嘅民調：

唔需要深入分析，唔需要睇係咪within error margin，你淨係睇係最後嘅spread係紅定藍，你就會大約明白，點解Trump對香港國安法咁敏感同積極。喺呢個時候，就算習近平係佢親生細佬，都要擺上檯借嚟過過橋。

（For政治BB班嘅各位（係呀，你都有份，唔好以為自己例外）：民調其實真係唔係咁睇嘅，當中涉及好多客觀同非客觀因素，例如取樣、問題嘅設計、甚至問題字眼等等，不一而足。喺Midtown Manhattan定係120th Street問同一條問題，得出嚟嘅答案經已好唔同；Zogby同Gallup嘅poll亦都會有出入，好難就憑幾個數字去讀懂一份民調。不過，我亦冇咁多時間同版位去同大家研究呢樣嘢；所以，都係he荷霞hae聽我講故算啦。）

呢啲簡直係百年難得嘅機遇呀！

當你諗到呢度、同埋佢以及整個共和黨黨團想spin返件事成為Daddy Problem-Focused嘅決心，咁香港國安法，就係個necessary evil。由於中美貿易戰經已上映多時，要將Mommy Problem扭轉成為Daddy Problem所需嘅，小則一場國際轟動嘅外交風波，最保險嘅做法，係打一場國土以外嘅戰爭。

（然後我又聽到有KOL話，其實係習近平幫Trump連任，所以要祭出國安法。喂，大佬呀！你哋可唔可以傾掂啲劇本先開鏡呀？臨時演員都係演員，吹水你都吹得專業啲好喎！）

「咁美軍會唔會登陸香港㗎？我想This way Sir喎！」

老實講，我真係唔知。不過，中美喺維多利亞港打一場仗登陸戰嘅機會唔大，至少我係咁睇。我認為，真正嘅戰場（if any），將會係台海、甚至台灣。

道理好簡單：如果中國一意孤行、唔理美國嘅強烈抗議、繼續喺香港強推國安法的話，美國幾乎唯一可以做嘅「升級」行動，就係一定程度上、甚至全盤承認台灣獨立。如此一來，中國可選擇行嘅棋，就真係唔多。（美國唔可以因為中國喺香港推行國安法而派第七艦隊進入維港是常識吧？！）

退讓喺國安法嘅層面上，可能係步好棋；問題係，自智商低落嘅習近平上台之後，中國幾時行過一步好棋？如果喺國安法上拒絕退讓，咁喺台灣統獨問題上，就更加冇退讓嘅可能（空間）。屆時中共可以行嘅唯一一步棋，就係進攻台灣、武力統一。中美嘅實體戰爭，將會喺台灣發生。

以中美目前嘅軍事實力對比，中共並冇任何勝算可言。最後嘅結局，就只剩下攬炒嘅程度 — 究竟係一開戰48小時內，被美軍嘅surgical bombing擺平晒啲頭目、喺群龍無首下投降、成為海灣戰爭（Gulf War/Desert Storm；1990–1991）之後嘅伊拉克；定係將僅餘嘅核武攬炒式咁射向美台甚至歐盟、然後成為聯合國共管嘅非武裝地帶。

但無論戰爭嘅結果如何，如果劇本真係按照呢個方向發生的話，Donald Trump嘅連任，可以話係篤定。事實上，當拜登都焗跟機表態撐香港、認為美國應該帶領世界譴責中國，似乎Trump同佢團隊嘅spin，應該初步有效；輿論應該會轉向香港呢個Daddy Problem。

相信喺未來嘅一兩星期，大家會有更加清晰嘅方向。

係呢篇文最後衝刺嘅時候，事態又再有進一步嘅發展。

I certified to Congress today that Hong Kong does not continue to warrant treatment under United States laws in the same manner as U.S. laws were applied to Hong Kong before July 1997. No reasonable person can assert today that Hong Kong maintains a high degree of autonomy from China, given facts on the ground.

如果，中美最終會爆發一場實體戰爭的話，我相信，戰爭嘅第一鎗，剛剛經已打響。

各位，你哋準備好未？